Stamselle só bewaar
2011-09-16 07:00
Kaapstad – Ouers kan die stamselle van hul baba se naelstring in Durbanville laat bevries, indien hulle dink die kind kan dit later nodig kry.
Die maatskappy Cryo-Save Suid-Afrika, met sy hoofkantoor in Durbanville, is ’n stamselbank en ’n vennootskap van die firma John Daniel Holdings Limited en die oorsese Cryo Save Group in Nederland.
Die stamselle, wat met vloeibare stikstof teen -180C° bevries word, is afkomstig van die naelstring van ’n baba. Die witbloedselle kan ook uit die naelstringbloed geïsoleer en saam met die naelstringweefsel bewaar word.
Dit is egter nie dieselfde as embrioniese stamselle wat later gebruik kan word om enige sel in die liggaam te vorm en só “herstelwerk” te doen nie.
Terence Gregory en Arnoud van Tulder, albei direkteure van Cryo-Save Suid-Afrika, het erken dit bied nie ’n wonderkuur vir alle siektes nie.
“Maar dit bied hoop vir die toekoms.”
Hulle bewaar 9000 monsters in een houer, en ouers het die opsie om dit in Suid-Afrika en/of België te laat opberg.
Cryo-Save meen dit kan vir 70 siektetoestande gebruik word, maar in Suid-Afrika is nog geen oorplanting gedoen met selle wat uit ’n stamselbank kom nie
“Dit is algemeen bekend dat daar nie genoeg gebêre word om ’n volwassene te behandel nie, maar daar is genoeg vir ’n kind. En later kan ’n mens dit dalk vermeerder,” het Van Tulder gesê.
Prof. Michael Pepper, ’n stamselnavorser verbonde aan die Universiteit van Pretoria, het gesê teoreties kan die stamselle vir sekere siektes gebruik word.
Hulle gebruik bestaande kliniese navorsing om te impliseer waarvoor dit gebruik kan word, maar die situasies waarin dit van toepassing is, veral wat genetiese siektes betref, is min.
’n Openbare stamselbank wat toegang bied aan alle mense wat dit nodig het, kan ’n nasionale bate wees. )Die koste is:
Bewaring van naelstringbloed – R13 000 plaaslik in Durbanville en R16 500 internasionaal in België.
Bewaring van naelstringweefsel en -bloed – R16 800 plaaslik en R19 800 in België.
’n Jaarlikse heffing van sowat R200 moet ook betaal word.
– Volg Nuus24 op Twitter
- Die Burger