Sonkrag-vliegtuig pak eerste nagvlug aan
2010-07-07 07:46
Die Burger
Johannesburg - As die weer dit toelaat, sal die Solar Impulse HB-SIA-vliegtuigprototipe Woendagoggend vroeg in Switserland opstyg in ’n poging om die eerste nagvlug deur ’n sonkrag-aangedrewe vliegtuig sonder brandstof te voltooi.
Die vliegtuig sal na verwagting vanoggend omstreeks 07:00 vanaf die Payerne-vliegveld in die weste van Switserland opstyg.
As alles goed afloop, sal die vlieënier, Andre Borsch-berg, die HB-SIA-prototipe Donderdagoggend ná sonsopkoms weer by dieselfde vliegveld laat neerstryk.
Die Switserse avonturier Bertrand Piccard, president van Solar Impulse en die meesterbrein agter die HB-SIA, wil in 2013 of 2014 in ’n soortgelyke vliegtuig, wat ’n bietjie groter sal wees, sonder brandstof om die aarde vlieg.
Die eerste nagvlug-poging, wat vir verlede Donderdag beplan is, moes laat vaar word weens ’n foutiewe instrument in die vliegtuig se telemetrie-stelsel.
Dit is intussen vervang en teen Dinsdagmiddag het ’n verklaring op die Solar Impulse-webtuiste (www.solarimpulse.com) gelui toestande lyk goed vir die tweede nagvlug-poging wat vir vandag beplan is.
“Die somerweer in Switserland is baie onstabiel en daar is altyd ’n kans op donderstorms, so ons sal die weer mooi moet dophou,” lui die verklaring.
As die prototipe suksesvol opstyg, sal dit vir die grootste deel van vandag stadig maar seker styg tot ’n hoogte van 8500 m terwyl die vliegtuig se batterye deur die sonpanele op die vlerke gelaai sal word.
Kort voordat die son ondergaan, sal die vliegtuig daal tot ’n hoogte van 1500 m – waarop dit deur die nag slegs op die krag van die gelaaide batterye sal vlieg.
“Die vraag is of die vlieënier ekonomies genoeg kan vlieg om die battery-energie deur die nag te laat hou,” het Piccard gesê.
Die Solar Impulse-span van sowat 70 ingenieurs en tegnici, werk al vir meer as sewe jaar aan die HB-SIA-prototipe.
Dit het 12 000 sonpanele en ’n vlerkspan so groot soos dié van ’n Airbus A340 (63,4 m).
Die nagvlug-poging kan regstreeks op SolarImpulseTV op die webtuiste www.solarimpul se.com gevolg word.
- Volg Nuus24 op Twitter.
