Só slaap die mensdom
2010-03-08 14:35
Washington – Die 2010 "Sleep in America"-peiling wat Maandag deur die Nasionale Slaapvereniging (NSF) in Amerika bekendgestel is, het getoon dat etniese groepe se slaapgewoontes van mekaar verskil.
Die meeste Afro-Amerikaners hou daarvan om te bid voordat hulle gaan slaap, terwyl blanke Amerikaners daarvan hou om saam met hulle troeteldiere te bid. Asiate slaap glo die beste en Spaans-Amerikaners is geneig om voor slaaptyd aan werk te dink.
Sowat 1007 volwassenes tussen die ouderdom van 25 en 60 het aan NSF se jaarlikse studie in Amerika deelgeneem.
Afro-Amerikaners het die besigste slaaptyd-roetine.
Driekwart van hulle het gesê hulle kyk eers vir ‘n uur lank televisie voordat hulle gaan slaap en sowat 71% het gesê hulle bid eers.
Slegs 18% van die Asiate, een derde van die blankes en minder as die helfte van die Spaans-Amerikaners bid voordat hulle gaan slaap.
Een uit tien Afro-Amerikaners en Spaans-Amerikaners het glo elke aand seks voor hul slapenstyd. Dit is tien keer meer as Asiate en twee en ‘n half keer meer as blankes.
Asiate slaap volgens die studie glo die beste.
85% van die Asiate het gesê hulle kry minstens vier nagte per week ‘n goeie nagrus in en die meeste meen hulle het nie slaappille nodig nie.
Spaans-Amerikaners word glo die meeste deur finansiële-, werks-, persoonlike-, of gesondheidsprobleme wakker gehou, het die studie getoon.
Byna vier uit elke tien Spaans-Amerikaners en ‘n derde van Afro-Amerikaners verloor slaap weens bogenoemde probleme.
Intussen meld die meeste blankes aan dat hulle met hul troeteldiere slaap.
Sowat 14% van die blankes het gesê hulle slaap met hul hond of kat, terwyl slegs 2% van die ander etniese groepe gesê het hulle doen ook.
Minstens 28% van die Asiate het gesê hulle slaap met hul kinders in dieselfde vertrek, terwyl slegs 22% van die Spaans-Amerikaners, 15% van die swartes en 8% van die blankes met hulle kinders in dieselfde kamer slaap.
"Indien jy wel sukkel om te slaap en jy saam met jou lewensmaat, kinders, troeteldier of al drie slaap, kan dit moontlik die rede vir jou onrustige nagrus wees,” het Sonia Ancoli-Israel, die voorsitter van NSF se taakmag gesê wat die peiling uitgevoer het.
Soos daar verskille is, kom daar ook ooreenkomste onder die slaapgewoontes van verskillende etniese groepe voor.
Al die groepe het gesê hulle het al werks- of familieverwante funksies misgeloop, omdat hulle te moeg was (19%-24%).
Al die groepe het gesê hulle is soms net te moeg vir seks.
– Sapa-AFP