Só kan jy slagoffers in Japan help
2011-03-14 11:21
Kaapstad – Die verwoestende aardbewing en tsoenami in Japan is verby, maar vir vele het die tyd van herstel en groot hartseer nou eers begin.
Dié ramp kan die duurste aardbewing in die geskiedenis word en die krisis kan aansienlik vererger as probleme by die Fukushima-kernkragstasie noord van Tokio nie spoedig opgelos word nie.
In die internet-era is dit egter makliker as ooit vir die wêreld om hulp aan Japan te verleen, en daar is verskeie maniere waarop Suid-Afrikaners ook aanlyn kan help.
Help via Facebook
Die Rooikruis het ‘n veldtog op Facebook se Causes-afdeling van stapel gestuur om geld in te samel vir Japan.
Deur op Facebook in te teken en hier te kliek, kan jy enigiets van $10 (sowat R70) tot $500 (R3 465) skenk om die slagoffers te help.
Bemark op jou webwerf
As jy ‘n webwerf het en jou kliënte en besoekers betrokke wil kry, skep ‘n boodskap wat bo aan jou webwerf verskyn.
Die “hallo-strook” gebruik ‘n eenvoudige kode en verskyn dan bo aan jou webwerf.
Teken eenvoudig in met die kode “helpjapan” en jy sal die kode ontvang wat jy benodig om die boodskap op jou webwerf te laat verskyn..
Lees hier meer oor hoe om die donasie-strook bo aan jou webwerf te plaas.
Hou van ‘n Facebook-bladsy
Diegene by Explore.org skenk $1 vir elke “Like” van die “Dog Bless You”-Facebook-blad.
“Soek- en reddingshonde is ‘n kritieke hulpbron in noodsituasies,” het Charlie Weingarten, stigter van Explore.org, Sondag gesê.
Gebruik jou Twitter-rekening
Span jou Twitter-rekening in om die mense van Japan te help.
Twitter het Maandagoggend in ‘n blog-inskrywing maniere gegee waarop mense bydraes kan maak.
Hier is ‘n paar Twitter-sleutelwoorde wat jy kan volg of tweet wat verband hou met die krisis.
* #Jishin: fokus op algemene inligting oor die aardbewing
* #Anpi: ‘n sleutelwoord vir die bevestiging van ‘n individu of plek se veiligheid
* #Hinan: Inligting oor ontruiming
* #311care: mediese inligting vir die slagoffers
* #PrayforJapan: algemene sleutelwoord vir ondersteuning en goeie wense vir slagoffers van die krisis.
Kliek hier vir nog maniere waarop jy ‘n bydrae kan maak.