Slimfoon nou jou beste inkopiemaat
2011-08-26 09:02
Pretoria – ’n Slimfoon sal eersdaags jou beste inkopiemetgesel word.
Só het Pieter Geldenhuys, ’n strateeg van die Instituut vir Tegnologie-strategie en Innovasie, op ’n netwerksessie van die Suid-Afrikaanse Raad van Winkelsentrums (SACSC) se Pretoria-tak gesê.
Geldenhuys het in sy aanbieding die toekoms van inkopies bespreek waar hy neigings uitgelig het en hoe slimfoon-tegnologie ingespan kan word om die huidige inkopiemodel in Suid-Afrika te bevorder.
“Die ganse wêreld sal binnekort op tentoonstelling wees – van jou foon af.”
Volgens huidige selfoonneigings is een uit elke drie selfoon-internetsoektogte plaaslik.
“Nadat iemand ’n plaaslike besigheid met behulp van hul slimfoon op die internet opgesoek het, het 61% van dié gebruikers die besigheid gebel en 59% het die besigheid besoek.”
Hy het gesê kopers sal binnekort vooraf die winkelsentrum of selfs winkel van hul keuse aanlyn van hul slimfone af kan “besoek”.
“Só sal jy ook kan sien of jy vertrap gaan word deur ander inkopiegangers as jy nou soontoe wil gaan.”
Volgens Geldenhuys sal winkelsentrums se parkeerterreine teen Desember al met sogenaamde slimfoon-strepieskodes (quick reference of QR-code) toegerus wees.
“Inkopiegangers sal dan dié kode met hul slimfone kan afneem, wat hulle dan na hul motors sal terugbegelei deur middel van die foon se GPS.”
– Volg Nuus24 op Twitter.
- Volksblad