Slimfoon monitor vel, gesondheid

2012-11-29 14:03

Tokio – Die maatskappy Fujitsu het Donderdag in Japan ‘n nuwe slimfoon bekendgestel wat gebruikers se veltoestand monitor deur na letsels en vlekke te soek.

Die Hada Memori-foon laat vroue toe om die kleur van hulle vel te monitor, en hou ook enige ander veranderings op die vel dop.

‘n Woordvoerder vir Fujitsu het verduidelik dat ‘n spesiale kaart met 'n opening van 15 mm in deursnee teen die wang gedruk word, waarna 'n foto van die vel geneem word. Die slimfoon ontleed dan die uitslae.

Die Hada Memori is die eerste in ‘n reeks beplande toestelle wat gebruik sal word om mense se stresvlakke te meet en hul oefengewoontes te reguleer. Dié reeks sal ook gebruik word om te toets of gebruikers genoeg slaap kry.

Fujitsu beplan om gesondheidsdata op dié manier te versamel, wat weer later aan skoonheidsmaatskappye verkoop kan word.

Die maatskappy hoop om oor die volgende twee jaar een miljoen van dié slimfone te verkoop.

– Volg Nuus24 op Twitter
 

- AFP