Slimfoon moet raaisel oor ruimte oplos

2013-02-26 12:22

Nieu-Delhi – ‘n Span navorsers van die Universiteit van Surrey het ‘n slimfoon die ruimte ingestuur in 'n poging om 'n teorie te toets wat danksy 'n bekende wetenskapfiksierolprent gewild geword het.

Die span navorsers sal ‘n spesiale slimfoontoepassing gebruik om die teorie te toets dat niemand jou kan hoor as jy in die ruimte gil nie. Dié teorie het gewild geword danksy die rolprent Alien.

Die span het dié slimfoon op 'n satelliet gemonteer wat in Indië gelanseer is. Die Scream in Space-toepassing, wat deur die Cambridge Universiteit ontwikkel is, sal gille in die ruimte speel, en dan monitor of sensors op die foon die klank optel. Volgens die teorie kan klank nie in die ruimte in golfvorm oorgedra word nie.

Die satelliet word egter nie net gebruik om dié eenvoudige raaisel op te los nie. Die duursaamheid van standaard kommersiële komponente van slimfone in die ruimte sal ook onder die vergrootglas wees, terwyl twee nuwe stuurstelsels vir satelliete ook getoets sal word.

Die Strand-1 se vordering kan op Twitter gevolg word.

– Lees hier meer.

– Volg Nuus24 op Twitter