Slim vang sy selfoonsein
2011-11-02 07:05
Johannesburg – Hoe slimmer jou foon is, hoe swakker is sy sein-ontvangs.
Daar is volgens ingenieurs van Vodacom verskeie redes waarom selfoongebruikers sal bevind moderne slimfone het nie dieselfde sterk seinontvangs as ouer, eenvoudiger selfone nie.
“As jy in die middel van nêrens op ’n wildplaas staan, sal jy met daardie ou baksteen-selfone met die lang antennas waarskynlik maklik ’n sein goed opvang, terwyl jy met ’n moderne slimfoon op dieselfde plek heel moontlik geen sein sal kry nie,” het ’n ingenieurs gesê.”
Richard Boorman, woordvoerder van Vodacom, het gister gesê verskeie uitdagings beperk moderne slimfone se seinontvangs.
“Slimfone is basies konstant op die agtergrond in ’n data-gesprek met basisstasies gewikkel om byvoorbeeld nuwe Facebook-statusopdaterings, e-pos en BlackBerry Messenger (BBM)- boodskappe te stuur en te ontvang. As al dié goed gebeur terwyl jy ook bel of SMS, is daar ’n veel groter kans dat een van die kommunikasiestrome onderbreek sal word.”
Ouer selfone het volgens hom gewoonlik net een (dikwels uitwendige) antenna gehad wat op een frekwensie (900 MHz) gewerk het.
“Slimfone het egter verskeie interne antennas vir ’n verskeidenheid frekwensies vir Bluetooth, WiFi, EDGE, 3G, GPRS en HSDPA. Dit skep ’n uitdaging om bloot genoeg ruimte in die slimfoon vir al die antennas te vind. Dit raak dan ook al hoe waarskynliker dat die seinontvangs onderbreek kan word as gevolg van hoe die foon vasgehou of rondbeweeg word.”
Die programmatuur in slimfone moet volgens hom boonop gereeld opgegradeer word om te verseker die slimfoon bly aanpasbaar by nuwe toerusting en aanlyndienste.
Ouer selfone is nie deur sulke opgraderings geraak nie en moes net oproepe en SMS-boodskappe kon hanteer.
“Die seinsterkte van moderne slimfone is ... swakker as dié van ouer selfone. Dít help om batterykrag te bespaar omdat ’n slimfoon, met al sy funksies, baie batterykrag nodig het. Natuurlik het dit dan ’n negatiewe uitwerking op die foon se ontvangs en verbintenis met selfoontorings.”
As Facebook, Twitter, die internet en BBM op ’n foon dus nie vir jou baie belangrik is nie en jy moeg is daarvoor dat oproepe weens swak ontvangs afgesny word en jy goeie seinontvangs op afgeleë plekke wil hê, kry ’n stokou foon met ’n lang antenna.
- Om jou slimfoon se batterykrag te spaar en hom vinniger te laat funksioneer, kan jy sogenaamde App Killer of Task Killer-toepassings vir iPhone- en Android-fone aflaai wat alle onnodige applikasies op die agtergrond outomaties afskakel.
– Volg Nuus24 op Twitter
- Beeld