'Slim kous' hou baba se hartklop dop

2012-11-28 08:40

New York – 'n Span studente by die Brigham Young-universiteit in Utah het met 'n vindingryke produk vorendag gekom wat nuwe ouers waarskynlik in die toekoms sal help om heelwat rustiger te slaap, sonder om hulle te bekommer of hul baba nog asem haal.

Dié nuwe monitor, wat aan 'n baba se voet gedra word in die vorm van 'n kous, monitor die hartklop en bloedsuurstofvlakke, berig die tegnologiewebwerf Mashable.

Die monitor stel ouers dan deur middel van 'n selfoontoepassing in kennis as daar rede is tot kommer oor die baba se welstand. 

As die baba ophou asem haal, of as die hartklop verander, verskyn 'n boodskap op die ouer se slimfoon.

Die Owlet Baby Monitor is geskep deur die student Jacob Colvin en sy span. Colvin is self 'n pa van twee, en hoop die toestel kan help om die aantal babasterftes te verminder.

“Ons hoop om ouers tyd te gee om te reageer en te sien dat iets fout is voor dit te laat is,” het Colvin gesê.

– Lees hier meer.

– Volg Nuus24 op Twitter.