Slanke Buddy beslis nie meer potjierol
2011-09-16 09:04
Bloemfontein – Mense is beslis nie die enigste wesens wat slapelose nagte oor ’n ekstra rolletjie om die middel het nie.
Buddy Knoesen, ’n driejarige bruin worshond van Fichardtpark in Bloemfontein, het binne agt maande 6 kg verloor. Sy soettand en liefde vir onder meer sjokolade het die skaal aan die begin van die jaar tot op ’n stewige 13 kg laat klim.
Danksy dié stewige gewig wat Buddy verloor het, is hy nou die Vrystaatse finalis in die Hill’s Pet Slimmer-program. Buddy ding mee met nege ander maerder honde in Suid-Afrika wat ook van hul oortollige gewig ontslae geraak het.
Sy eienaars, Roché Knoesen en Jean Wolmarans, sê hulle het nooit verwag Buddy sal so ver kom nie.
“Ons het hom ingeskryf omdat hy gewig moes verloor. Hy het só vet begin raak dat ons bekommerd geraak het dat sy ruggie dalk kan ingee.”
Buddy het glo nie ’n maklike lewe gehad voordat Knoesen en Wolmarans hom op drie maande aangeneem het nie. As sy nuwe ouers het hulle besluit om hom tot in die afgrond te bederf.
“Hy het alles geëet wat ons eet. Van sjokolade, roomys, tot alle soorte vleis en kos wat vet maak,” sê Knoesen.
Hulle meen ondanks sy vet lyfie was hy steeds verbasend aktief.
In Januarie het Wolmarans van dié program gehoor en hulle het besluit om Buddy in te skryf.
Die program is 14 jaar gelede geskep om die toenemende epidemie van oorgewig honde aan te pak en aan diere-eienaars die nodige ondersteuning en gereedskap te verskaf wat hulle nodig het om hul diere te help gewig verloor.
“Die grootste uitdaging by die huis was om op te hou jammer voel vir Buddy en hom kos te gee om elke draai,” sê Knoesen.
Stadig maar seker het Buddy se gewig van 13 kg tot ’n skrale 7 kg gedaal.
Knoesen sê Buddy se oefenprogram het swem, stap en hardloop ingesluit, en hy het ’n lae-cholesterol-dieet gevolg.
Buddy geniet steeds sy dieet en is baie opgewonde met etenstye. “Ek weet dit was die moeite werd wanneer ek nou na hom kyk, en wil hom graag só hou vir so lank moontlik.”
Buddy staan ’n kans om R25 000 te wen, en mense kan vir hom stem by www.petslimmer.co.za.
– Volg Nuus24 op Twitter.
- Volksblad