Slaap bly sleutel tot sukses op skool
2011-09-07 15:10
Incheon – Hoërskoolleerders wat oor naweke probeer om verlore slaap in te haal sukkel meer met aandagtoetse as tieners wat minder slaap, het navorsers bevind.
Die Koreaanse navorsers het bevind die opbou van ‘n “slaapagterstand” kan kinders se intellek kniehalter.
“Dit is soos ‘n bank. Hulle is die heeltyd op ‘n oortrokke rekening van slaap,” het David Gozal, ‘n kenner van slaapprobleme van die Universiteit van Chicago in Amerika, gesê.
“As jy jou kredietkaart so sou bestuur, sou jy bankrot wees,” het hy gesê.
Kinders wat oor naweke laat geslaap het omdat hul in die week minder geslaap het, het swakker gevaar met die aandagtoetse as kinders wat nie probeer inhaal het nie, het die navorser Seog Ju Kim van die Gachon-universiteit in Incheon, Korea bevind.
“Aandag en uitvoerende aksies is die eerste stappe na akademiese sukses,” het hy gesê. “Die behoefte aan slaap is nie iets wat ons kan oorslaan nie.”
Volgens die Amerikaanse hart-, long- en bloedinstituut moet skoolkinders minstens nege ure ‘n nag slaap.
Die navorsing is in die joernaal Archives of Pediatrics & Adolescent Medicine gepubliseer.
– Volg Nuus24 op Twitter.
- Reuters