Skype-skeppers dagvaar eBay
2009-09-17 14:03
San Francisco - ’n Maatskappy wat deur die breine agter Skype besit word, het die internet-foondiens en sy nuwe eienaar, eBay, vir oorskryding van kopiereg gedagvaar.
Die dagvaardiging kan eBay se planne om Skype vir sowat $2 biljoen (R15 miljard) te verkoop in die wiele ry.
Janus Friis en Niklas Zennstrom, eienaars van Joltid Bpk, voer aan dat Skype ’n ooreenkoms verbreek het aangaande tegnologie wat die maatskappy aan Skype uitlisensieer.
Die dagvaardiging is nie net op Skype en eBay gerig nie, maar ook op private beleggers wat ingestem het om Skype te koop.
Dié groep sluit lede van eBay en Skype se direksies in.
Joltid se dagvaardiging eis $75 miljoen (R552 miljoen) in skadevergoeding per dag, en dring ook daarop aan dat Skype ophou om die maatskappy se tegnologie te gebruik.
Friis en Zennstrom het Skype in 2005 aan eBay verkoop, en die maatskappy in 2007 verlaat.
- Reuters