Skool verruil handboeke vir tabletrekenaars

2012-09-27 11:30

Johannesburg – ‘n Privaatskool in Boksburg het besluit om weg te doen met handboeke om eerder e-boeke, e-posse en tabletrekenaars te gebruik.

Die Sunward Christian Academy gaan volgende jaar ‘n ‘e-skool’ word met wi-fi wat gratis aan leerders verskaf sal word sodat hulle hul lesse op hul tabletrekenaars kan aflaai, het The Star berig.

Adele Huyzers, skoolhoof van Sunward Christian Academy, het aan die koerant gesê die ouers van die sowat 200 leerders in die skool sal geld bespaar.

“’n Ouer wat handboeke vir sy kind koop sal sowat R3 500 spandeer. E-boeke kos sowat R800,” het Huyzers gesê.

Huiswerk sal aan leerders per e-pos of op ‘n geheuestokkie verskaf word.

Leerders sal Google tydens klasse kan gebruik en sal hul lesse met tabletrekenaars kan afneem.

Volgens The Star sal ‘n tabletrekenaar jou sowat R2 500 kos en sal dit glo sowat drie tot vier jaar hou.

Ouers sal kennisgewings van hul kind se vordering via hul selfone ontvang.

Leerders sal egter steeds skryfboeke hê waarin hulle werk moet doen en sal ook hul eksamens met pen en papier aflê.

– Volg Nuus24 op Twitter
 

- SAPA