Skewebek-kameelperd vreet dat die tande klap
2010-07-29 09:06
Nelspruit - ’n Skewebek kameelperdkoei wat in die omgewing van die Numbihek in die Krugerwildtuin rondwei, laat haar nie sommer onderkry nie.
“Ten spyte van haar gebrek, vreet sy dat dit bars en is sy lekker spekvet en gesond,” het Pottie Potgieter van Nelspruit gesê.
Potgieter het sowat twee weke gelede op die koei afgekom wat op die S7-pad tussen die Numbi- en Phabeni-hek saam met ’n trop van sowat ses kameelperde gewei het.
“Ek kon eers nie glo wat ek sien nie!
“Ons het gewonder of sy nie maar net haar bek so trek nie,” het Potgieter gesê.
Hy en sy vrou, René, het die dier, wat sowat 15 meter van die pad aan die boomtoppe staan en vreet het,’n uur lank dopgehou.
Die dier het die blare met haar tong nader gehark en gekou ten spyte daarvan dat haar twee kake nie behoorlik op mekaar pas nie.
Potgieter is van mening die dier het haar bokaak óf tydens ’n nekgeveg met ’n ander kameelperd gebreek óf sy is beseer toe sy deur ’n roofdier aangeval is.
Dr. Roy Bengis, staatsveearts in die wildtuin, het gesê dit is die eerste keer dat hy so ’n afwyking by ’n kameelperd sien.
“As ek na die foto’s kyk, reken ek die koei is eerder met die afwyking gebore.”
Hy sê daar is duidelike tekens dat die bokaak en neusbeen onderontwikkel is en dat die onderkaak ook skeef ontwikkel het.
“Dat die jong dier, wat na raming twee jaar oud is, só lank oorleef het, is merkwaardig,” het Bengis bygevoeg.
Volgens hom moet die dier oorleef deur die blare met haar tong te stroop en dan in haar mond te maal.
Volgens Bengis het dr. Markus Hofmeyr, wat betrokke is by die wildtuin se wildvangeenheid, die kameelperd voorheen in die Stolsnek-omgewing in die suide van die wildtuin opgemerk.
- Die Burger