Skaap, takbok onafskeidbaar
2011-12-08 11:52
Beijing – Chinese internetgebruikers het by ‘n wildpark gepleit om ‘n verliefde manlike skaap en vroulike takbok toe te laat om saam te bly nadat hul paargewoontes kommer begin wek het.
Werkers by die wildpark het na die land se halfmiljard internetgebruikers gedraai vir raad nadat die takbok en die ram met hul vreemde verhouding begin het.
Hul romantiese verhouding het die hooftrekke gehaal in China nadat ‘n plaaslike televisiestasie in die suidwestelike provinsie Yunnan die storie vertel het en berig het dat pogings om die paar te skei onsuksesvol was.
Teen Donderdag het die storie oor die onskeibare paar meer as 1 700 opinies op China se weibos – mikro-blogdienste soortgelyk aan Twitter – uitgelok.
“Ek het gehuil toe ek die video kyk, dit is liefde... hulle het die struikelblokke oorkom en is uiteindelik saam,” het een gebruiker onder die naam Qianjiang gesê.
‘n Ander gebruiker het gesê die storie van die onskeibare paar het “my weer in liefde laat glo”.
“Liefde tussen ‘n skaap en ‘n takbok is wonderlik, miskien sal iets snaaks daaruit kom, ek moedig almal aan om hierdie dop te hou,” het beibei5332 gesê.
– Volg Nuus24 op Twitter
- Sapa - AFP