Sjokolade dalk goed vir jou?
2010-02-12 20:35
Toronto - 'n Onlangse studie het bevind dat sjokolade dalk jou risiko vir 'n beroerte kan verlaag.
Dié inligting is Donderdag bekend gemaak en sal by die Amerikaanse Akademie vir Neurologie se 62ste jaarlikse vergadering in Toronto van 10 tot 17 April voorgelê word.
"Nog navorsing moet gedoen word om vas te stel of sjokolade die risiko vir beroerte verminder en of gesonder mense meer sjokolade as ander eet," het Sarah Sahib, skrywer van die studie, gesê.
Nóg 'n studie het bevind dat mense wat sjokolade eet se kans om ná 'n beroerte te sterf, minder is as mense wat nie sjokolade eet nie.
Die eerste studie het bevind dat 44 489 mense wat een stuk sjokolade per week eet se kans op 'n beroerte is 22% minder as mense wat geen sjokolade eet nie.
Die tweede studie het bevind dat 1169 mense wat 50g sjokolade een keer 'n week eet se kans om te sterf ná 'n beroerte, is 46% minder as mense wat nie sjokolade eet nie.
– Sciencedialy