Sjimpansees omhels mekaar ná vrylating
2011-09-09 10:06
Johannesbur – Aangrypende beeldmateriaal van ’n groep sjimpansees van Oostenryk wat mekaar vasdruk en omhels nadat hulle vir die eerste keer in 30 jaar in die natuur vrygelaat is, het webtuistes oor die wêreld heen aan die gons.
Die 38 sjimpansees is 30 jaar gelede kort ná hul geboorte in ’n navorsingseenheid deur ’n farmaseutiese maatskappy in aanhouding geplaas sodat eksperimente op hulle uitgevoer kan word.
Hulle is in afsondering geplaas sodat eksperimente vir die behandeling van MIV/vigs en geelsug gedoen kan word.
Die groep sjimpansees is in 1997 gered toe die maatskappy verkoop is. Daarna is hulle onder die sorg van kenners geplaas wat sedertdien probeer het om die diere weer in die natuur vry te laat.
Dierkundiges het Maandag die groen lig gegee dat die diere uiteindelik in die natuur vrygelaat kan word.
Op die beeldmateriaal kan duidelik gesien word hoe hulle eers onseker en dan nuuskierig in die lug opkyk.
Daarna lyk dit asof hulle feesvier en ’n paar gryp mekaar om die nekke om stywe drukke te gee.
’n Ooggetuie het gesê die sjimpansees het mekaar omhels asof hulle hul vryheid wou vier. Hulle het ook gelag.
Renate Foidl, wat betrokke was by hul vrylating, het gesê die sjimpansees is verskriklik gelukkig. “Dit is ’n wonderlike gebeurtenis. Ek wag al jare vir dié oomblik.”
Hennie Butler van die departement dierkunde en entomologie aan die Universiteit van die Vrystaat wat spesialiseer in dieregedrag, sê diere het beslis emosie.
“Diere het persoonlikhede en ervaar emosies.
“Omdat hierdie sjimpansees in afsondering was en nie die natuur ken nie, sal ek eerder sê hulle het mekaar vasgehou omdat hulle onseker gevoel het.”
Hy sê dit is ’n nuwe omgewing en die aanraking is dikwels ’n teken van vertroosting.
“Maar mens kan vir seker van diere verwag om in dié omstandighede ’n baie sterk emosie te ervaar,” sê Butler.
Kyk hier na die sjimpansees se emosionele vrylating.
– Volg Nuus24 op Twitter.