Sjimpansee van Tarzan-faam sterf
2011-12-29 09:16
Kaapstad – Cheetah, die sjimpansee wat in die vroeë 1930’s in die Tarzan-flieks gespeel het, is in die rype ouderdom van 80 dood.
Hy was sedert 1960 in die Suncoast Primate Sanctuary in Florida, Amerika.
Me. Debbie Cobb van dié veilige hawe het gesê hy is op 24 Desember aan nierversaking dood nadat hy vyf dae vroeër siek geword het.
Cheetah het saam met Johnny Weismuller, wat die rol van Tarzan vertolk het, in van dié gewilde flieks gespeel.
Weismuller, ’n Olimpiese swemmer, is in 1984 in die ouderdom van 79 dood.
“Cheetah het ’n goeie geaardheid gehad en was lief daarvoor om mense te sien lag. Dit het voorgekom of hy ingestel was op mense se gevoelens,” het Cobb gesê. “Hy het ook van vingerverf gehou”.
Mnr. Eugene Cussons, besturende direkteur van die Jane Goodall Instituut Suid-Afrika se Sjimpansee Eden, buite Nelspruit, het gister aan Die Burger gesê 80 jaar vir ’n sjimpansee is besonders oud.
“Maar sijmpansees raak amper net so oud soos mense, gewoonlik so 65 jaar. Hul lewensfases stem baie met ons s’n ooreen.”
Cussons het gesê sjimpansees gaan gou dood as hulle alleen aangehou word en depressief raak. “Hulle moet in ’n groep wees, hulle moet gestimuleer word met aktiwiteite en hul habitat moet so na aan die natuurlike een as moontlik wees.”
By dié veilige hawe is die oudste sjimpansee tans die 59-jarige Joao, met wie dit goed gaan.
– Volg Nuus24 op Twitter
- Die Burger