Sex.com te koop
2010-03-11 05:10
New York - Sex.com, een van die waardevolste webadresse, sal volgende week opgeveil word aangesien die vorige eienaar nie sy skuld kon betaal nie, berig CNN Money.
Elcom LLC het blykbaar in 2006 dié webadres vir omtrent R103 miljoen gekoop.
Die maatskappy kon egter nie hul skuld aan DOM Partners LLC, by wie hulle geld geleen het om die adres te koop, terugbetaal nie.
Gevolglik word sex.com voetstoots verkoop.
Die veiling sal die 18de Maart in New York plaasvind en enigiemand wat wil bie, sal ‘n gesertifiseerde tjek van R7.4 miljoen na die veiling toe moet bring.
Richard Maltz, afslaer van Maltz Auctions wat die veiling sal behartig, het gesê baie kopers het al belangstelling getoon, maar hulle kan nog nie sê vir hoeveel die adres op die ou end sal verkoop nie.
“Dis ‘n ongelooflike geleentheid vir iemand,” het hy gesê.
Sex.com het glo in ‘n stadium omtrent R111 000 per dag gemaak, sê Charles Carreon, ‘n prokureur wat oor die geskiedenis van sex.com in sy boek, The Chronicles of sex.com, skryf.
Pizza.com is in 2008 vir omtrent R18 miljoen opgeveil, wat ‘n aanduiding gee van wat verwag kan word.
Kliek hier vir die volledige storie.