'Sewe minute van drama' kan Nasa-sending kelder
2012-08-02 12:29
Washington – Terwyl die grootste en beste ruimte-verkenningstuig ooit stadig maar seker nader aan Mars beweeg, staal 'n span tegnici by die Amerikaanse ruimte-agentskap (Nasa) hulle vir sewe van die mees dramatiese minute in die geskiedenis van ruimteverkenning.
Die Curiosity-verkenningstuig, wat elke dag 'n bietjie nader aan sy eindbestemming op Mars reis, word op 6 Augustus op dié planeet verwag.
‘n Gewilde video op die internet, met die titel “Seven Minutes of Terror”, wys hoe tegnici beplan om vir die eerste keer ooit ‘n vuurpyl-aangedrewe hyskraan te gebruik om dié verkenningstuig saggies op Mars se oppervlak neer te sit.
Die Mars-wetenskaplaboratorium-projek, wat 'n volle $2,5 miljard (sowat R20 miljard) kos, gebruik die gesofistikeerde Curiosity-verkenningstuig om verskeie klippe op Mars te ondersoek vir leidrade wat wetenskaplikes kan help om vas te stel of daar ooit lewe op die Rooi Planeet was.
“Ek sal die eerste een wees om te erken dat hierdie soos ‘n absurde projek lyk,” het Bill Nye, ‘n bekende Amerikaanse wetenskaplike en president van die Planetary Society, gesê.
“Die mense wat aan die projek gewerk het, is die beste in die wêreld, so ek dink al die ingenieurs-besluite sal redelik akkuraat wees.”
Die verkenningstuig sal die Gale-krater op Mars verken. Nasa verwag dat hierdie krater dalk die onbekende verlede van Mars kan blootlê.
Wetenskaplikes weet nou aansienlik meer van Mars as 50 jaar gelede. Hulle weet nou dat Mars eens op ‘n tyd water gehad het, wat die waarskynlikheid van mikrobiese lewe aansienlik verhoog.
Daar word selfs gehoop dat wetenskaplikes dalk in die nabye toekoms op Mars se oppervlakte kan begin boor om te sien of daar dalk nog water onder die grond vloei.
Vir eers sal die Curiosity Mars se oppervlak verken en foto’s terugstuur aarde toe.
Die projek is al vir 12 jaar aan die gang, en is van stapel gestuur toe Nasa se Polar Lander in 1999 kontak met die aarde verloor het.
Meer as die helfte van ekspedisies na Mars het al misluk.
– Volg Nuus24 op Twitter
- Sapa - AFP
