Selfone kan maak dat Afrika gou e-leer
2010-07-05 12:08
Beeld
Kaapstad – Internettoegang via selfone is die antwoord vir elektroniese onderrig (e-onderrig) in Afrika.
Dit is die mening van verskeie Kaapse internetkenners wat met e-onderrig werk.
Hulle het gereageer op ’n navraag oor Johann Rupert, die sakemagnaat, se stelling Maandag by Fortune, Time en CNN se wêreldforum dat die internet Afrika se onderwysprobleem kan oplos.
Johann van Tonder, ’n internetstrateeg van Naspers, het gesê die internet-penetrasie in Suid-Afrika is tot dusver swak.
Die grootste uitdaging was gebrekkige bandwydte. Die probleem is egter gepak met ’n ondersese kabel wat aangelê is en nog een wat op pad is.
Die Seacom-kabel is ’n optiese vesel-onderwaterdatakabel wat Suid-Afrika met die wêreld verbind via die ooskus van Afrika.
Dit is die eerste onderwaterkabel wat langs die ooskus van Afrika geïnstalleer is.
Mededingers is besig om tot die mark toe te tree, wat internet nog goedkoper en meer toeganklik gaan maak.
Groter toeganklikheid sal e-onderrig outomaties laat toeneem.
“Op die oomblik is die internet nog ’n ‘ding’, mettertyd sal dit - soos elektrisiteit - ’n gegewe word.”
Selfone gee ook vir toenemend meer mense internettoegang.
Juliet Stoltenkamp, e-opvoedingsbestuurder by die Universiteit van die Wes-Kaapland, het gesê die grootste uitdaging om e-opvoeding te bevorder, is om dosente te oorreed om hul onderrigmetodologie te verander.
UWK kyk tans na ’n projek om tegnologie so te ontwikkel dat studente aan aanlyn-gesprekke via hul selfone kan deelneem.
“Dit kan ongelooflike moontlikhede vir Afrika inhou.”
Tony Carr van die sentrum vir tegnologie en ontwikkeling by die Universiteit van Kaapstad het gesê die universiteit is verbind tot die bevordering van die internet in die akademie.
Aanlyn-onderrig word gebruik om kursusse vir studente in verskeie lande, wat slegs vir kort tydperke by die universiteit kan wees, aan te bied.
Susan van der Merwe, woordvoerder van die Universiteit Stellenbosch (US), het gesê die US is een van die mees innoverende universiteite in die land wat tegnologie betref.
Hulle het ’n e-kampus wat tegnologie gebruik om onderrig en navorsing te bevorder.
- Volg Nuus24 op Twitter.