Selfone kan kankerrisiko vergroot – WGO-groep
2011-06-02 08:55
Londen – Die gebruik van ’n selfoon kan die ontwikkeling van sekere soorte breingewasse versnel en verbruikers moet aan ’n manier dink om hul blootstelling aan selfone te verminder, het kenners van die Wêreldgesondheidsorganisasie (WGO) vandeesweek gesê.
’n Oorsig van alle beskikbare wetenskaplike bewyse het gesuggereer dat die gebruik van selfone as “moontlik karsinogenies (kankervormend)” geklassifiseer behoort te word, het ’n werkgroep, wat bestaan uit 31 wetenskaplikes van 14 lande, op ’n vergadering van die WGO se internasionale agentskap vir kanker- navorsing (IARC) gesê.
Dié klassifikasie, wat die gebruik van ’n selfoon in dieselfde breë IARC-kategorie vir die risiko van kanker plaas as lood, chloroform en koffie, kan die WGO noop om sy riglyne vir selfone te hersien, het die wetenskaplikes gesê.
Langer en meer gedetailleerde navorsing is nodig voordat ’n definitiewe antwoord oor enige verband gegee kan word.
Voorheen was die WGO van mening dat daar geen getuienis was oor ’n verband tussen die gebruik van selfone en kanker nie.
“Ná oorweging van al die relevante getuienis ... het die werkgroep elektromagnetiese velde van radiofrekwensie as moontlik karsinogenies by mense geklassifiseer,” het Jonathan Samet, voorsitter van die IARC-werkgroep, op ’n telefoniese mediakonferensie gesê.
Sommige getuienis suggereer ’n verband tussen die gebruik van selfone en ’n verhoogde risiko vir glioma, ’n soort breinkanker, het Samet gesê.
Groepe in die selfoonbedryf het die uitspraak dadelik begin afmaak en beklemtoon dat selfs produkte soos gepiekelde groente en koffie as “moontlik karsinogenies (kankervormend)” geklassifiseer is.
“Die IARC-klassifikasie beteken nie selfone veroorsaak kanker nie,” het John Walls, visepresident vir openbare skakeling van CTIA, die Amerikaans gebaseerde groep vir die vervaardigingsbedryf van mobiele toestelle, gesê.
Walls het bygevoeg dat die IARC-werkgroep net bestaande navorsing vertolk het en nie self nuwe navorsing gedoen het nie en dat die Amerikaanse voedsel- en-medisyne-owerheid (FDA) reken “wetenskaplike bewyse het nog nie die gebruik van selfone met enige gesondheidsprobleme verbind nie”.
Volg Nuus24 op Twitter.
– Reuters Life!
- Beeld