Seldsame evolusie-boek gevind
2009-11-22 19:55
Londen – ‘n Veilingshuis sê dit sal ‘n seldsame eerste uitgawe van Charles Darwin se "On the Origin of Species", wat in ‘n gesin se badkamer in die suide van Engeland gevind is, opveil.
Christie's Auction House het Sondag gesê dié boek, wat een van slegs sowat 1250 kopieë wêreldwyd is, is in ‘n boekrak in ‘n gesin se gastebadkamer gevind.
Dit is in 1859 gedruk en sal Dinsdag, op die 150ste herdenking van die uitgewe van dié bekende boek, opgeveil word. Volgens Christie's sal die boek na bewering vir £60 000 (sowat R751 629) verkoop.
Darwin se "The Origin of Species" het die voetstuk van die moderne wêreld se konsep oor evolusie gevorm. Feesvieringe reg oor die wêreld het vanjaar die 200ste herdenking van sy geboorte gevier.
- Sapa