Seekoei het haar eie Facebook-blad
2011-11-18 10:08
Hoedspruit – Sy weeg 1,2 ton, het haar eie Facebook-blad, hou van tee en slaap in die aand op ’n matras met ’n duvet op die huis se stoep.
Die “mak” seekoei Jessica is boonop wêreldbekend en meer as 80 dokumentêre TV-programme is al oor haar gemaak.
Volgens Tonie Joubert, haar eienaar, is daar “’n wêreld se verskil” tussen Jessica en Humphrey, die seekoei wat Marius Els van Orkney die naweek doodgemaak het.
“Ek het hom (Els) meer as een keer gewaarsku om versigtig te wees,” het Joubert, wat 45 jaar lank ’n veldwagter was, gesê.
Volgens hom het Els hom meer as een keer gebel om te hoor wat “die beste” vir Humphrey is. “Ek het vir hom gesê om vir hom ’n vers te kry en hom alleen te los in ’n dam op sy plaas.”
Joubert het gesê nie alleen het Humphrey se testosteroonvlakke tot sy aggressie bygedra nie; hy het ’n geskiedenis van probleme. Els was glo die vierde eienaar van die dier. “Die seekoei het nie ’n band met iemand gehad nie.” Boonop is bulle meer territoriaal as koeie.
“Wat met Els en Humphrey gebeur het, is bitter tragies,” het Joubert gesê.
Hy en sy vrou, Shirley, het ’n noue band met Jessica, wat in die Blyderivier voor sy plaas bly sedert sy vyf dae oud is. Sy het nog haar naelstring aangehad toe Joubert op haar op een van die walle afgekom het. Haar ma is dood.
“Jessica is vry om te kom en gaan soos sy wil. Ons dwing niks op haar af nie. Sy wil by ons wees,” het Joubert gesê.
Jessica is 11 jaar en 8 maande oud. Sy swem in die aand in die rivier na ’n plek waar ander seekoeie bly. Sy gaan altyd terug na die Jouberts se huis.
Die Jouberts het gesê mense moenie wat met Els gebeur het, met hul situasie vergelyk nie. “Dit is glad nie dieselfde nie.”
– Volg Nuus24 op Twitter.
- Die Burger