Sasol vra studie oor sonkrag
2012-02-03 08:01
Kaapstad. – Die petrochemiese reus Sasol het BrightSource Energy, ’n Amerikaanse sonkragtegnologiegroep, en die internasionale kragtoerustingsgroep Alstom gekontrakteer om ’n ingenieursontwerpstudie oor gekonsentreerde sonkrag in Suid-Afrika te doen.
BrightSource, wat in 2006 gestig is, spesialiseer in sontoringtegnologie. Dit is waar ’n reeks spieëls die son se strale op ’n sentrale toring konsentreer en die hitte gebruik word om stoom op te wek. Die stoom word dan gebruik om elektrisiteit op te wek.
Volgens Henri Loubser, uitvoerende hoof van Sasol New Energy, sal die studie na verwagting teen die derde kwartaal van vanjaar voltooi wees. Dit sal fokus op die bou van ’n sonkragaanleg van 125MW.
Loubser sê hoewel ’n moontlike sonkragprojek waarskynlik te laat sal wees vir die eerste ronde van die regering se aankoopprogram vir hernieubare energie wat einde verlede jaar begin het, sal Sasol graag aan latere rondes wil deelneem.
Namate die koste van gekonsentreerde sonkrag afneem, sal Sasol elektrisiteit vir eie gebruik wil opwek.
Loubser sê hopelik sal die ingenieursontwerpstudie lesse insluit uit BrightSource se huidige projek om sonkrag-opgewekte stoom aan die oliegroep Chevron te lewer op ’n olieveld in Amerika waar stoom gebruik word om olie-ontginning te verbeter.
’n Beleggingsbesluit oor ’n sonkragaanleg vir Sasol kan teen middel volgende jaar geneem word afhangende van die uitslag van die studie.
Joe Desmond, senior visepresident vir kommunikasie en regeringsake van Bright-Source Energy, sê die maatskappy se sontoringtegnologie gebruik lugverkoeling, wat 95% minder water gebruik as paraboliese-trogtegnologie – die ander hooftegnologie vir gekonsentreerde sonkrag.
Desmond sê die maatskappy waaruit BrightSource ontstaan het, het 25 jaar gelede in Kalifornië sy eerste paraboliese-trog-sonkragaanleg gebou en tussen die eerste en die negende aanleg het koste met 50% gedaal.
Die tegnologie het drie hooftoepassings: kragopwekking, stoomopwekking vir verbeterde olie-ontginning en hitteverskaffing vir gebruik by ontsoutingsaanlegte of in ander nywerhede.
VSasol het volgens I-Net Bridge Donderdag gesê sy verdienste per aandeel in die halfjaar tot einde Desember is tussen 80% en 90% hoër as ’n jaar tevore, grootliks danksy hoër oliepryse en ’n swakker rand-dollar-wisselkoers.
Sasol maak op 12 Maart sy halfjaarresultate bekend.
– Volg Nuus24 op Twitter
- Die Burger