Sandy: Twitter speel sleutelrol in reddingswerk
2012-10-31 08:32
San Francisco – Terwyl Orkaan Sandy Maandag aan die VSA se ooskus verwoesting gesaai het, het miljoene Amerikaners hulle tot Twitter gewend as nuus- en nooddiens.
Dié sosiale netwerk het vir baie inwoners 'n sleutelrol gespeel in 'n tyd wat baie ander webwerwe en landlyndienste deur die stormweer buite aksie gestel is.
Regeringsagentskappe, nuusbronne en inwoners het die diens gebruik om waardevolle inligting te bekom, nuusflitse uit te stuur en selfs om hulp te ontbied.
Twitterprofiele soos dié van die New Yorkse goewerneur Andrew Cuomo (@NYGovCuomo) en die federale noodhulpagentskap (@FEMA), sowel as @NotifyNYC, 'n profiel wat deur New York se nooddienste bestuur word, is gebruik om belangrike nuus oor stormaktiwiteit en ontruimings te deel.
Terwyl die 911-noodnommer Maandag en Dinsdag 'n stortvloed oproepe ontvang het, het ander inwoners die brandweer se @fdny-profiel gebruik om inligting te vra en om hulp te ontbied.
Een bejaarde het met behulp van Twitter hulp gevra uit 'n gebou in Manhattan. 'n Ander gebruiker het 'n Instagram-foto aan die @fdny-profiel gestuur met drie houertjies insulien wat dadelik gevries moes word. Nog 'n Twitter-gebruiker het die netwerk gebruik om 'n kragopwekker te vind vir 'n vriend in die middestad wat 'n ventilator gebruik.
By die Rooikruis van Amerika se hoofkantoor in Washington D.C. is ses rekenaarmonitors gebruik om voere Twitter- en Facebook-boodskappe te vertoon, wat gebruik is om 'n kaart te skep wat kon wys waar hulp die nodigste is.
Dié kaart is gebruik om te bepaal waar die Rooikruis sy personeel ontplooi, het Wendy Harman, die Rooikruis se direkteur van sosiale strategie, gesê.
"Ons het uitgevind ons kan die Rooikruis se sending uitvoer deur [gebruik te maak van] die sosiale web," het Harman gesê.
– Volg Nuus24 op Twitter.
- Reuters
