Samsung vergoed Microsoft vir patente

2011-09-29 15:26

New York – Die Amerikaanse sagtewarereus Microsoft en die Suid-Koreaanse elektronikavervaardiger Samsung sal vergunning maak om mekaar se patente te mag gebruik.

Microsoft het gesê die ooreenkoms met Samsung sal “breë dekking vir beide maatskappye se produkte” voorsien.

Die Amerikaanse maatskappy het gesê hy sal tantieme ontvang van Samsung vir dié se gebruik van Google se Android-bedryfstelsel op sy draagbare toestelle.

Microsoft het Android beskuldig dat hy sy patentregte ignoreer.

Google bied die bedryfstelsel gratis aan vervaardigers van slimfone en tabletrekenaars.

“Dit is die selfde ou taktiek wat Microsoft altyd gebruik,” het Google in ‘n verklaring gesê.

“Hulle behaal nie sukses op die mark vir slimfone nie en gebruik dan regsaksie om wins van ander se prestasies af te rokkel terwyl hulle vooruitgang vertraag.”

– Volg Nuus24 op Twitter.
 

- AFP