Sagteware kan teen pedofiele op Facebook beskerm
2012-07-12 10:38
San Francisco – Op 9 Maart vanjaar het spesiale Facebook-sagteware 'n verdagte gesprek op dié sosiale netwerk bespeur.
'n Man in sy vroeë dertigs het oor seks gepraat met 'n 13-jarige meisie van Florida en wou haar die volgende dag ná skool ontmoet.
Dié spesiale program, wat profiele en gesprekke nagaan vir verdagte aktiwiteit, het die span by Facebook dadelik in kennis gestel, en die polisie is ontbied.
Beamptes het die tiener se rekenaar gekonfiskeer en die man die volgende dag in hegtenis geneem, het Jeffrey Duncan van die Florida-wetstoepassingseenheid gesê.
"Die manier en die spoed waarteen hulle ons gekontak het, het ons die vermoë gegee om so gou moontlik op te tree," het Duncan gesê.
Facebook is net een van die vele maatskappye wat nuwe tegnologie gebruik om pedofiele en ander oortreders vas te vat. Dié tegnologie word gebruik om uit te kyk vir sekere woorde en gevalle waar kontakbesonderhede uitgeruil word. Die aanlyn-gesprekke van pedofiele kan selfs gebruik word om die program te "leer" waarvoor om op die uitkyk te wees.
"Daar is maatskappye daar buite wat baie goeie werk doen, wat werk met die beperkinge wat hulle het," het Brooke Donahue, lid van 'n spesiale FBI-span vir aanlyn-misdaad, spesifiek seksuele misdrywe, gesê.
Die National Center for Missing and Exploited Children het verlede jaar 3 638 gevalle van "uitlokking" van kinders aanlyn hanteer – minder as die 4 053 gevalle in 2010 en 5 759 in 2009.
– Volg Nuus24 op Twitter.
- Reuters
