SA vlakvark steel harte in Japan
2011-07-19 09:53
Johannesburg – ’n Tweejarige Suid-Afrikaanse vlakvark, Org, wat hom elke aand tuismaak op ’n sitkamerbank voor die TV in Lephalale (Ellisras), is al tot in Japan bekend.
Erika Tempel (50) het hom sedert 2008 hans grootgemaak nadat ’n plaaslike veearts hom in die pad aangetref het.
Tempel en haar man, Hendrik, is die bestuurders van die Fahad-wildtuin in Lephalale naby die Botswana-grens en sien al jare om na weesdiere in die omgewing. Org is ook om dié rede na haar gebring.
Tempel het ook ’n gemeenskapsprojek, Hassah (wat “kosbaar” beteken), waar vroue van die omgewing kralewerk doen.
Die vroue maak ook sogenaamde sheswe-kopbande vir ’n bekende Japanse groep.
“Vir die snaaksigheid het ons toe vir Org ’n sheswe-strik in sy hare gesit, ’n foto geneem en vir dié Japanners ge-e-pos.”
Volgens Tempel het die Japanners ’n uitstappie na ’n dieretuin in Japan gereël om die vlakvarke daar te gaan ontmoet.
“Vandat Org agt maande oud is, stap ek elke dag lang ente met hom in die veld en vat hom daagliks vir ’n modderbad,” het Tempel vertel.
“Org leef in twee wêrelde, een van ’n wilde vark bedags en saans is hy nes ’n huismuis, oftewel (huis)vark wat binne slaap.”
In Junie het Org vir die eerste keer vir twee weke lank uitgeslaap.
“Hy het die meisie van sy drome ontmoet. Hulle het lekker lepelgelê in die een of ander gat wat hulle gegrou het.”
Tempel het gesê sy het gedink hy is vir altyd weg totdat Org dié meisie ’n paar keer huis toe gebring het.
“Nét tot op die grasperk waarna hy ewe vermakerig, stertjie in die lug weer saam met haar in die bosse in verdwyn het.”
Ná sowat twee weke het die vark teruggekeer na sy daaglikse roetine van soggens 06:00 uitgaan en saans 18:00 terugkom.
Saans vreet hy hom trommeldik aan hondeblokkies en dan malvalekkers vir nagereg, waarna hy hom op die bank gaan tuismaak.
Hy hou ook van mielies, maar moet daagliks met die neushoringvoëls daarvoor kompeteer.
Volgens Tempel gaan lê hy eerder bo-op die mielies as om dit met hulle te deel.
“Hy is nou so groot dat hy die hele driesitplekbank vol lê,” het Tempel gesê.
Soms deel hy die bank met die Tempels se honde en vier mak muishonde wat op sy lyf slaap.
– Volg Nuus24 op Twitter.
- Beeld