SA staan tou vir iPhone 5

2012-12-14 13:52

Kaapstad – Die splinternuwe iPhone 5 is van Vrydag af op Vodacom- en iStore-winkels in Suid-Afrika se rakke, en verkoop glo reeds soos soetkoek.

'n Winkelassistent by die iStore in Sandton het gesê tussen 40 en 50 mense het Vrydagoggend al buite die winkel tou gestaan voor die deure geopen het.

Die iStore in Canal Walk se voorraad is glo ook al vroeg uitverkoop.

‘n Winkelassistent by die Vodacom 4U-winkel het gesê mense het Vrydagoggend ook buite dié winkel tou gestaan.

“Tussen 50 en ‘n 100 mense het buite die winkel staan en wag toe ons die deure geopen het,” het sy gesê.

Volgens haar het hulle minder as 100 eenhede van die iPhone 5 ontvang.

Die Vodacom-winkel by die Waterfront in Kaapstad het net 10 fone ontvang, en dié eenhede is uitgehou vir kliënte wat dit vroeër bestel het.

“Ons het meer as 2 500 bestellings ontvang. Ons sal Maandag nog fone kry, maar dit sal net op kontantbasis verkoop word,” het die verkoopsklerk by die Waterfront-winkel gesê.

Die iPhone 5 is die dunste en ligste iPhone nog.

Pryse van die iPhone 5 16GB begin by R8 299.

– Volg Nuus24 op Twitter

– News24