SA se eerste nano-satelliet bekend gestel
2011-10-01 07:00
Kaapstad – Suid-Afrika se eerste nano-satelliet – wat binne net nege maande ontwikkel is – is Vrydag in Bellville onthul.
Dié piepklein satelliet wat 10 cm breed, 10 cm hoog en 10 cm lank is, moet nie onderskat word nie – hy het skop in sy lyfie van net meer as 1 kg.
Dit is gebou en ontwerp deur sowat 50 studente en dosente aan die Kaapse Skiereilandse Universiteit van Tegnologie se Frans-Suid-Afrikaanse Instituut vir Tegnologie (F’SATI), onder leiding van prof. Robert van Zyl, direkteur van die satellietprogram.
Die span is reeds besig om te werk aan ’n tweede, groter nano-satelliet van 30 cm by 10 cm. Die hoop is om die kleiner satelliet aanstaande jaar saam met ander soortgelykes met ’n vuurpyl te lanseer.
Die satelliete staan bekend as CubeSats, wat volgens internasionale ontwerpe en vasgestelde standaarde gebou word. Die satelliet wat gister op die kampus onthul is en nou in ’n “skoon kamer” gehou word, staan amptelik bekend as ZACUBE-01.
Hy het onder meer ’n kamera, telebevel- en telemetrie-radio’s en ’n hoëfrekwensie-bakensender aan boord. Dié sender sal gebruik word vir waarneming van die ionosfeer bo die suidpool.
Net voor die onthulling het Van Zyl aan die gehoor gesê: “Ek moet julle waarsku: Hy is klein. So klap asseblief hande vir die studente se onthalwe,” waarop die gehoor spontaan gereageer het.
Deesdae kan ons baie meer doen met veel minder, het Van Zyl gesê toe hy die CubeSat met Spoetnik vergelyk het.
Die eerste internasionale CubeSat werksessie in Afrika is pas by die kampus aangebied.
Dr. Philippe Willekens, uitvoerende direkteur van die Internasionale Ruimtevaart-federasie, het gesê sulke satelliete is ’n uitstekende manier om vaardighede aan studente te leer en dit kan bruikbare missies ook oplewer. Die uitdaging is om hulle gelanseer te kry.
– Volg Nuus24 op Twitter
- Die Burger