SA sal binnekort minder besoedel
2011-08-03 10:51
Johannesburg – Suid-Afrika is een van die 12 grootste lugbesoedelaars ter wêreld en die grootste in Afrika.
“Dáárom is die verantwoordelikheid op die land soveel groter om drastiese stappe te doen om sy kweekhuisvrystellings in te perk.”
Só het Edna Molewa, minister van waterwese en omgewingsake, gister in Pretoria gesê in die program vir die aanloop tot die Verenigde Nasies se COP17-klimaatberaad wat einde vanjaar in Durban aangebied word.
Molewa het gesê Suid-Afrika as ontwikkelende land gaan die lug in die volgende nege jaar (tot 2020) erg besoedel, maar daarna sal die hoeveelheid kweekhuisgasse wat die land die atmosfeer instuur met 34% afneem.
Daarna sal dit ’n plato bereik wat vir 15 jaar gehandhaaf sal word.
In 2035 sal dit met 42% afneem.
Sy het gesê dit klink dalk na ’n teenstrydigheid dat Suid-Afrika steeds kragsentrales bou en steenkool verbrand. Sy het egter probeer verduidelik omdat die land nog besig is om te ontwikkel, het hy daardie “geleentheid” om tot 2020 (ter wille van ontwikkeling) die lug te besoedel.
“In die volgende nege jaar sal ons verskeie hernubare projekte inspan om die land te help om na ’n groen ekonomie oor te skakel.”
Sy het daarop gewys volgens die Internasionale Energie-agentskap was 2010 die jaar waartydens die meeste kweekhuisgasse ooit in die atmosfeer vrygestel is.
Dit is daarom dat Suid-Afrika die klimaatberaad gaan aanbied.
“Dit mag nie ’n mislukking wees nie. Die samesprekings in Durban mag nie die einde van die Kioto-verdrag beteken nie.”
Sy het daarop gewys dat Suid-Afrika se inwoners hulself sal moet voorberei om by klimaatsverandering aan te pas. Suid-Afrika sal namens die lande in Afrika die ontwikkelende wêreld probeer oortuig om ’n fonds spesiaal daarvoor op die been te bring, het sy gesê.
Die voorspelling is dat temperature aan die kus teen 2050 met tussen 1 °C en 2 °C gaan styg en dié in die binneland met 2 °C tot 3 °C.
“Ons sal dus daarby móét aanpas.”
Bome en beddens
– 20 000 beddens gaan in Durban beskikbaar wees tydens die klimaatberaad.
– 2 000 fietse en elektriese motors gaan ingespan word in ’n poging om die beraad se koolstofvoetspoor te verklein.
– Die departement van omgewingsake gaan in die volgende paar maande met bewusmakingsveldtogte oor klimaatsverandering in al die provinsies begin.
– Miljoene bome gaan van nou af tot in 2014 oor die land heen, maar veral in Limpopo, geplant word.
– Die beraad is van 28 November tot 9 Desember.
– Volg Nuus24 op Twitter.
- Beeld