'SA oorweeg om eie satelliete te lanseer'
2011-10-04 07:03
Kaapstad – Suid-Afrika dink daaraan om in die toekoms sy eie satelliete te lanseer.
Só het Naledi Pandor, minister van wetenskap en tegnologie, Maandag hier by die opening van die 62ste Internasionale Ruimtevaartkongres (IAC) voor meer as 2 000 afgevaardigdes gesê.
“Ons wonder hoekom ons miljoene aan lansering moet bestee wanneer die motgifballetjies by sulke geriewe by Arniston vermeerder,” het sy gesê.
Sy het nie verder oor die moontlike planne uitgewei nie, maar gesê Suid-Afrika beskik ook op Grabouw (by Houwteq) oor geriewe om satelliete te integreer.
Sy het gesê Algerië, Nigerië, Kenia en Suid-Afrika is reeds betrokke by ’n projek waar elke land sy eie mikrosatelliet – soortgelyk of groter as SumbandilaSat – sal bou. Ander lande is welkom om aan te sluit. Die satelliete sal saam gelanseer word, maar ál die lande het dan toegang tot elke satelliet se data.
Pandor het na die Square Kilometer Array (SKA) verwys as een van dié eeu se grootste wetenskaplike projekte.
“Dit is nie net groot wetenskap nie, maar ’n reuse-ingenieursprojek waaruit nuwe tegnologie vloei.”
Wetenskap het ’n invloed op die ekonomie, en die feit dat meer as 2 000 mense vir vyf dae Kaapstad toe gekom het, staaf dit.
“Ek hoop my kollegas in die kabinet sien dit en besef ons moet meer geld in die wetenskap belê.”
– Volg Nuus24 op Twitter
- Die Burger