SA migreer nou nóg later na digitale TV
2012-01-27 07:00
Kaapstad. - Die digitale migrasie-omskakelingsproses, waarvolgens Suid-Afrika se TV-seine van analoog na digitaal omgeskakel gaan word, gaan nog ’n spertyd mis.
Suid-Afrika sou teen 2014 die transformasie na digitale sein moes afgehandel hê.
Dina Pule, minister van kommunikasie, sê dit sal egter moeilik wees om by dié datum te hou.
Sy het vroeër dié week gesê die een groot mikpunt vir die jaar, die proses van dubbele illuminasie – waarvolgens digitale sowel as analoog tv-seine tegelykertyd uitgesaai sal word – sal nie meer in April gebeur nie.
“Die organisasies wat verantwoordelik is vir dié proses het aangedui hulle is nie gereed nie.
Die nuwe mikpunt vir dié dubbele illuminasie om in werking te tree is nou die derde kwartaal van die jaar.”
Die staatsbeheerde kommunikasie-agentskap Usaasa is verantwoordelik vir digitale migrasie in Suid-Afrika.
Dié organisasie is egter die laaste paar maande in ’n warboel en moes einde verlede jaar Phineas Moleele, sy uitvoerende hoof, op spesiale verlof plaas omdat hy glo met ’n interne forensiese ondersoek gepeuter het.
Nog drie topbeamptes van Usaasa, Andrew Hlubi (finansiële hoof), Molefi Mollo (ontwikkelingshoof) en Archie Mbatha (logistieke bestuurder) word ook ondersoek, onder meer weens hul rol in die wanbesteding van tot R29 miljoen by die agentskap.
Usaasa moet onder meer sorg dat spesiale dekodeerders in Suid-Afrikaners se huise geïnstalleer word.
Tot 5 miljoen van dié dekodeerders moet teen ’n koste van R2,4 miljard onder arm huishoudings versprei word.
Sentech, die seinverspreider, en die SAUK is ook belangrike rolspelers in die proses.
Pule sê sy sal volgende week met die uitvoerende hoofde van Sentech en die SAUK vergader oor die proses.
“Ek het hulle gevra om verslag te kom doen oor die digitale migrasie-vordering.”
– Volg Nuus24 op Twitter
- Die Burger