SA kry hupstoot vir teleskoop-projek
2012-02-23 09:01
Kaapstad. – Suid-Afrika se hoop om die Square Kilometre Array-teleskoop (SKA) te huisves, het Woensdag ’n hupstoot gekry met die aankondiging dat dit vir BTW-verligting sal kwalifiseer.
Dít is as Suid-Afrika (saam met agt ander Afrika-lande) die bod vir die grootste radioteleskoop ter wêreld teen Australië wen.
Die radioteleskoop sal uit sowat 3 000 kleiner teleskope bestaan. Die twee ankerlande op die kortlys moes intussen teleskope begin bou om te toon dat hulle tegnologie kan hanteer wat strook met die verwagtinge van die SKA.
Suid-Afrika se MeerKAT-teleskoop word in twee fases gebou waarvan die eerste in 2010 afgehandel is. Die laaste fase sal teen 2013-’14 voltooi word. Die aanvanklike belegging in die SKA-projek word gemeet aan die internasionale finansiering van R15,3 miljard wat Suid-Afrika kan kry om dit te huisves.
Pravin Gordhan, minister van finansies, sê die belastingverligting sal hopelik vir Naledi Pandor, minister van wetenskap en tegnologie, ’n voorsprong gee om die SKA vir Suid-Afrika los te slaan.
– Volg Nuus24 op Twitter
- Die Burger