Rotte op Galapagos-eilande geteiken
2012-11-15 15:18
Quito – Amptenare in Ecuador sê unieke voël- en reptiel-spesies in die Galapagos-eilande moet bewaar word – en dit beteken miljoene rotte op die eilande moet so gou as moontlik van kant gemaak word.
‘n Helikopter het begin om nagenoeg 22 ton spesiaal vervaardigde gif op een van die eilande te gooi in ‘n poging om die indringer-rotte uit te wis.
Die rotte, wat in die 17de eeu deur seerowers en walvisjagters na die eiland gebring is, voer op die eiers van die eilande se inheemse spesies, wat reuse-skilpaaie, akkedisse, slange, valke en likkewane insluit. Die rotte eet ook van die plante wat as voedsel vir ander diere moet dien.
Veral voëls is erg bedreig op die eiland as gevolg van die rotte se teenwoordigheid.
“Dit is een van die ergste probleme wat ons op die Galapagos het. Rotte plant elke drie maande voort en eet alles,” het Juan Carlos Gonzalez, ‘n natuurbewaarder, gesê.
Die doel is om alle uitheemse rotte van kant te maak sonder om inheemse spesies te benadeel. Die projek sal by die kleiner eilande in die Galapagos-groep begin.
Die eilande wat bewoon word, Isabela en Santa Cruz, sal laaste geteiken word.
‘n Totaal van 34 valke is van die Pinzon-eiland verwyder om te verhoed dat hulle van die dooie rotte eet. Hulle sal in Januarie weer vrygelaat word.
Die Galapagos-eilande is in 1978 as ‘n natuurlike erfenisterrein verklaar.
– Volg Nuus24 op Twitter
- AP
