Rolprentmaker deel haar ondervindings op Facebook
2010-09-28 21:43
San Francisco – Eers het Facebook gehelp om die rolprentmaker, Michaelene Risley uit ‘n tronk in Afrika te bevry.
Nou gaan die sosiale netwerk ‘n globale platform skep waar Risley haar storie kan vertel wat handel oor die mite dat seks met ‘n maagd kan jou van vigs genees.
Risley sal Dinsdag haar storie vertel wat tydens ‘n lewendige uitsending op Facebook uitgesaai sal word. Facebook se meer as 500 miljoen gebruikers sal ook die geleentheid kry om vrae aan haar te rig.
Volgens Risley was sy in 2007 besig om haar dokumentêr in Zimbabwe te verfilm, met toestemming vanaf die ministerie van inligting, toe sy in hegtenis geneem is.
Owerhede was glo bekommerd oor haar projek wat deur die werk van Betty Makoni, die menseregte-aktivis en die Girl Child Network in Zimbabwe, geïnsipireer was.
Risley sê sy is gearresteer en ondervra, met vrae wat meer oor die lewe in Amerika gegaan het as haar dokumentêr.
‘n Vervaardiger van die dokumentêr het op Facebook geskryf dat Risley in aanhouding is en onsekerheid oor haar toekoms heers.
‘n Verslaggewer wat die span op Facebook gevolg het, het iemand by die Amerikaanse regering van die voorval ingelig, wat glo op sy beurt kontak met Zimbabwiese beamptes gemaak het en gehelp het dat Risley vrygelaat word.
Risley en haar span het na Amerika teruggekeer en haar dokumentêr is vroeër vanjaar voltooi.
- Volg Nuus24 op Twitter.
- AFP