Roem wink vir egpaar oor video van olifante
2011-11-22 08:11
Port Elizabeth – Televisie-roem wink vir ’n Baaise egpaar nadat hul verstommende beeldmateriaal van die redding van ’n olifantkalfie die internet aan’t gons het.
André en Mignonne van Heerden bestempel hul ervaring langs ’n watergat in die Addo-olifantpark as “ongetwyfeld die emosioneel uitmergelendste” wat hulle in 30 jaar in die wildernis aanskou het.
“Met tye moes ek myself net keer om nie uit te spring en die kalfie self te gaan red nie.
“Maar toe hy eindelik weer veilig met al vier pote op vaste grond staan, kon ons maar net huil. En toe ek om my kyk, was dit presies wat almal in die ander motors óók gedoen het,” het Van Heerden vertel.
Dit is reeds ’n jaar later en die dramatiese beeldmateriaal wat die Van Heerdens daardie dag geneem het, het deurgedring na môre-aand se eindronde van die kykNET-TV-program Kwêla se amateur-videokompetisie.
Sy sê dié dag in Oktober 2010 was die meeste van die watergate in die park uitgedroog en het die olifante water gekry uit ’n sement-trog. By Hapoor het die olifante langpad óm die droë gat trog toe geloop, maar die kalfie het regdeur probeer loop.
Die bedrieglike droë oppervlak het onder sy gewig meegegee en hy het pens en pootjies in ’n dam taai, grys kleimodder vasgeval.
Die dier se desperate gespook en gespartel het hom net dieper in die moeilikheid gekry. Sy ma en die res van die trop het naarstiglik probeer help deur droë sand op die modder te strooi, die steil wal meer gelyk te probeer trap en hul slurpe vertroostend om sy kop te vou. Maar vergeefs.
In ’n stadium het hy onder die modder weggesak, maar weer boontoe geworstel en toe uitgeput bly lê. “Soos ’n vrou maar is, het ek André gesmeek om te gaan help. Ons grootste vrees was dat hy gaan versmoor of dat sy organe onder die drukking van die modder sou ingee.“
Uiteindelik was dit die matriarg wat met die wenplan vorendag gekom het. Sy het die trop eenkant laat staan en toe die ma van die kant af raad gegee oor hoe om haar knapie uit te help.
“Die outjie was skoon bewerig op sy bene en hy het dadelik aan sy ma probeer drink. Hulle het ’n rukkie gerus en toe weggestap.
“Daar was nie ’n droë oog in sig nie nie!”
– Volg Nuus24 op Twitter.
- Volksblad