Roccy sal dalk gou weer sien
2011-12-11 10:00
Pretoria – Roccy, die blinde weesrenoster wat diep in die land se hart ingekruip het, sal eersdaags dalk weer kan sien.
Hy is blind sedert sy ma in Junie in die Elandela- private natuurreservaat buite Hoedspruit gestroop is.
Yvonne Gioia en haar man, Rocco, het eers ’n dag later die ontwaterde renosterkalf opgespoor. Hulle maak hom sedertdien met die hand groot.
Veeartse glo Roccy het van die trauma en waarskynlik houe teen sy kop katarakte ontwikkel en blind geword. Dié katarakte gaan nou by Onderstepoort in Pretoria verwyder word.
Me. Gioia het aan Rapport gesê hulle is positief dat dít Roccy se sig sal verbeter. Sy regteroog kan tans byna geen beweging waarneem nie en die linkeroog kan net-net tussen lig en donker onderskei.
Dit is gedeeltelik om dié rede dat Roccy so geheg geraak het aan een van Elandela se tuiniers, Shepard Mnissi, wat hom later voltyds opgepas het.
Rapport het vroeër berig hoe Mnissi soms 24 uur van die dag by Roccy moet bly, wat paniekerig raak wanneer hy nie sy maat kan aanvoel nie.
Me. Gioia het gesê Mnissi sal saam met Roccy op die vragmotor ry wat hom 450 km ver moet vervoer. Dit is die eerste keer dat Roccy op ’n voertuig gelaai sal word. Hy drink nog bottel met afgeroomde melk en ProNutro.
Roccy sal op 2 Januarie Pretoria toe vervoer word en die operasie is vir die volgende dag geskeduleer.
Die koste word gedek deur skenkings wat aan die Elandela Rhino Survivor Trust gemaak is.
* ’n Ander renosterkoei het gister op Elandela gekalf.
– Volg Nuus24 op Twitter
- Rapport