Robot help verlamde man met 'onmoontlike' klimtog
2011-07-06 14:31
Parys – ‘n Robotuitrusting wat die draer bomenslike krag gee het ‘n student in staat gestel om ‘n verlamde Japanse man teen die steil trappe van Mont-Saint-Michel uit te dra.
Seiji Uchida (49) het gesê dit was sy droom om die middeleeuse trappe van Mont-Saint-Michel in Frankryk te sien, maar ‘n motorfietsongeluk in sy 20's het hom verlam.
Sy droom het egter waar geword toe Hiromasa Hara van die Tsukuba-universiteit die Hybrid Assistive Limb gebruik het – ‘n meganiese uitrusting wat hom die bomenslike krag gegee het om Uchida die bult uit te dra.
Japanse navorsers het die robotuitrusting ontwerp.
Dit pas oor die draer se hele liggaam en lees breinseine en volg dan die draer se spierbewegings om te help met die vrag.
Hara kon tot 200 kg op sy rug dra.
“Dit was my droom om hierheen te kom,” het Uchida gesê. “Die berg is uiters ontoeganklik vir mense in rolstoele,” het hy bygevoeg.
Sy vrou en vier kinders het saam met hom na Frankryk gereis.
“Ek wil my kinders wys 'n mens kan ten spyte van struikelblokke enigiets aanpak,” het Uchida gesê.
– Kyk hier na 'n video van Uchida se droom wat waar word.
– Volg Nuus24 op Twitter.
- AFP