Renosterstropery styg skerp – minister

2012-12-10 15:00

Johannesburg – Altesaam 618 renosters is vanjaar al in Suid-Afrika gestroop, het Edna Molewa, minister van omgewingsake, Maandag gesê.

“Soos die getalle toeneem is dit duidelik dat almal ‘n kritieke rol het om te speel in die oorlog teen stropery,” het Molewa gesê na sy ‘n memorandum van verstandhouding met haar Vietnamese eweknie onderteken het.

Volgens ‘n verklaring van Molewa se kantoor is die memorandum in Hanoi onderteken in ‘n poging om samewerking tussen die twee lande te bevorder. Dit kan veral help om renosterstropery te bekamp.

Die provinsies wat die hardste getref is deur die stropery is Limpopo, KwaZulu-Natal en die Noord-Wes.

Altesaam 257 mense is vanjaar al in verband met renosterstropery in hegtenis geneem.

“Die voortdurende slagting van renosters is ‘n groot rede tot kommer,” het Molewa gesê.

“Die teken van hierdie memorandum dra by tot ons arsenaal teen renosterstropery en verhoog die aantal rolspelers wat werk aan die bekamping daarvan.”

– Volg Nuus24 op Twitter
 

- SAPA