Renosters kan binne 25 jaar uitsterf
2012-08-23 14:40
Johannesburg – Renosters kan binne die volgende 25 jaar uitsterf as hulle nie behoorlik beskerm word nie, het ‘n beampte van die departement van omgewingsake gesê.
“Teen die pas waarteen hierdie diere geslag word sal daar oor so 25 jaar geen meer renosters wees om oor te praat nie,” het Mavuso Msimang in Johannesburg gesê.
“Gelukkig is die pas waarteen hulle nou aanteel vinniger as die spoed waarteen hulle sterf. Hulle gaan nie binnekort uitsterf nie.”
Msimang het verslaggewers by die Johannesburgse buiteklub toegespreek oor die vergaderings tussen die department van omgewingsake en ander belanghebbendes.
Hy het gesê die doel van die vergaderings is om terugvoering aan die regering te gee en verskeie voorstelle te maak oor hoe om die renoster te bewaar.
Suid-Afrika het ‘n verantwoordelikheid om die renoster te bewaar, siende dat dit die grootste renoster-bevolking in die wêreld het. Die renoster is ook deel van die groot vyf.
“Die regering soek na oplossings,” het Msimang bygevoeg.
Die druk van permitte, wettiging van handel, tegnologie en veiligheid en sekuriteit tel onder die kwessies wat bespreek is.
“Sekuriteit is ons top-prioriteit. Sekuriteit moet verbeter word en dit moet op ‘n gesofistikeerde manier behandel word.”
Msimang sê die argument oor die handel in renosterhorings het belangrike kwessies aangeraak, soos die aanvraag na dié horings.
“As die handel in renosterhoring die sekuriteit van die renoster gaan verbeter, sal ek dit moeilik vind om dit nie voor te stel nie.”
Altesaam 339 renosters is al vanjaar in Suid-Afrika gestroop.
– Volg Nuus24 op Twitter
- SAPA
