Rampe kan SA oorweldig, sê kenner
2011-11-23 07:01
Pretoria – Suid-Afrika het nie genoeg hulpbronne om die rampe wat die land tref te beredder nie.
Vroeër was die neiging dat rampe net drie provinsies getref het, maar dit is nie meer die geval nie, het Mbuso Mthembu van die Suid-Afrikaanse Rooi Kruis-vereniging (SARKV) in ’n gesprek oor klimaatsverandering in Pretoria gesê.
Volgens hom het Mpumalanga die kleinste kans om onder ’n ramp deur te loop.
“Vanjaar het ons nog net op die een ramp ná die ander gereageer. Daar is vloede en tornado’s. Ons het nie genoeg hulpbronne om by alles uit te kom nie.”
Volgens Mthembu is 339 huise op Komatipoort die naweek in ’n tornado verwoes. Daarby het ’n tornado verlede maand 558 huise in Duduza aan die Oos-Rand beskadig of vernietig.
Hy het gesê dit is weens die verandering in weerpatrone dat die een ramp ná die ander dele van Suid-Afrika tref.
“As dié neiging voortduur, wat gaan ons doen? Ons het nie die vermoë om die probleme op te los nie.”
Verteenwoordigers van die SARKV, die Internasionale Rooi Kruis-federasie (IRKF) en die Internasionale Organisasie vir Migrasie was dit eens dat samewerking tussen die regering, burgerlike organisasies en gemeen- skappe kortkom.
“Die regering wil nie die verantwoordelikheid aanvaar vir die leiding van rampbestuur nie,” het Mthembu gesê.
“In die meeste lande is die kantoor vir rampbestuur in die president se kantoor sodat besluite vinnig geneem kan word.
“In Suid-Afrika is die kantore vir rampbestuur oral in departemente versprei en die een weet nie wat die ander een doen nie,” het hy bygevoeg.
“Die regering moet die rigting aanwys. Hy moet sê dit is hoe ons gaan optree wanneer ’n ramp ons tref.
“Daarby moet inligting aan gemeenskappe gegee word oor die risiko’s vir rampe.
“Hulle moet die risiko’s verstaan en die gemeenskappe moet gelei word sodat hulle weet wat om te doen as hulle deur ’n ramp getref word.”“Hoe meer dit reën, hoe meer rampe gaan ons tref.”
“In Suid-Afrika word die weer warmer, daar is ’n toename in die intensiteit van die reën en ’n afname in die hoeveelheid reëndae.
– Volg Nuus24 op Twitter
- Beeld