Puerto Rico baan weg vir groen toekoms

2012-11-01 16:42

San Juan – Owerhede in Puerto Rico het met die konstruksie van 'n sonkrag-park van $36 miljoen (sowat R311 miljoen) begin as deel van 'n plan vir groen tegnologie.

Dié land wil minder afhanklik van brandstof as energiebron wees.

Die sonkrag-park word in die suidelike dorp Salinas gebou deur twee maatskappye van Miami, genaamd Yarotek en Sonnedix. ‘n Seremonie is Woensdag gehou om die begin van die konstruksie te vier.

Amptenare sê die park sal na verwagting genoeg elektrisiteit genereer om krag aan 2 500 huise te verskaf.

Albei maatskappye het ook beloof om by twee groter sonkrag-projekte in die noorde van die land betrokke te raak.

Puerto Rico sal ook een van die dae die tuiste wees van die Karibiese Eilande se grootste windplaas.

– Volg Nuus24 op Twitter

- AP