Program wat Jode identifiseer verbied
2011-09-15 13:27
New York – Apple het Woensdag gesê ‘n iPhone-program met die naam “Jew or Not Jew?” is van sy Franse App Store verwyder oor negatiewe terugvoer van gebruikers.
“Die program oortree plaaslike wette in Frankryk en dit is nie meer beskikbaar in Frankryk se App Store nie,” het Tom Neumayr, ‘n woordvoerder van Apple, gesê.
Die groep SOS Racisme en ander Joodse groepe het skerp kritiek teen die program uitgespreek.
Die program verskaf inligting oor die geloofsoortuigings van sowat 3 500 bekendes.
Johann Levy, die vervaardiger van die program, het egter gesê die program is nie met opset aanstootlik nie.
Inteendeel, het hy gesê, is die program ontwerp om “Jode trots te maak” as hulle uitvind “’n sekere bekende is Joods.”
Frankryk verbied die versamel van inligting oor mense se geloofsoortuigings en oortreders kan vyf jaar tronkstraf of ‘n boete van €300 000 (sowat R3 miljoen) opgelê word.
– Volg Nuus24 op Twitter.
- AFP