Private straler, sakke vol geld vir Zuckerberg
2012-02-02 14:55
Menlo Park, Kalifornië – Facebook se planne vir 'n aanvanklike openbare aanbod het die sluier gelig oor dié jong maatskappy se verstommende groei en inkomste oor die laaste paar jaar.
Tot dusver was inligting oor Facebook se werklike finansiële prestasie moeilik bekombaar, maar sy planne om binnekort op 'n aandelebeurs te noteer het dié stand van sake verander, en potensiële beleggers uiteindelik 'n blik op sy geldsake gegee.
Volgens 'n dokument wat by die VSA se Securities and Exchange Commission (SEC) ingedien is, wil Facebook sowat $5 miljard (ongeveer 38 miljard) insamel in 'n aanvanklike openbare aanbod wat waarskynlik die grootste deur 'n internetmaatskappy sal wees sedert Google in 2004 genoteer is.
Die notering kan Facebook se waarde op $75 miljard tot $100 miljard te staan bring (sowat R587 miljard tot 770 miljard).
Behalwe vir die finansiële data in die dokument word interessante besonderhede oor die maatskappy ook gedeel. Mark Zuckerberg, die stigter en uitvoerende hoof, het die gebruik van 'n private straler, en verdien 'n basiese salaris van $500 000 (sowat R3,85 miljoen). Dis meer as drie keer soveel as die Google-stigters Larry Page en Sergey Brin toe Google destyds vir sy aanvanklike openbare aanbod aansoek gedoen het.
Facebook het verlede jaar 'n inkomste van $3.7 miljard (ongeveer 28,5 miljard) gehad, en 'n wins van $1 miljard (R7,7 miljard) gerapporteer.
Volgens die data is 85 persent van Facebook se inkomste van advertensies afkomstig.
– Volg Nuus24 op Twitter.