Politikus wat laster sê 100 keer jammer op Twitter
2011-06-02 15:35
Kuala Lampur – ‘n Maleisiese sosiale aktivis sal 100 keer op Twitter om verskoning vra in ‘n ongewone skikking met ‘n tydskrifuitgewer oor ‘n lastersaak.
Fahmi Fadzil, ‘n lid van die land se opposisieparty en ‘n bekende kommentator op sosiale kwessies, het in Januarie op Twitter gesê sy swanger vriend se werkgewers by ‘n Blu Inc Media-tydskrif behandel haar sleg.
Hy het ‘n paar uur later Blu Inc op Twitter om verskoning gevra vir die aantyging, maar die maatskappy het ‘n prokureursbrief aan hom gestuur en finansiële vergoeding asook ‘n apologie in hoofstroomkoerante geëis.
Fahmi se prokureur, Syahredzan Johan, het gesê sy kliënt het vandeesweek geskik en sal nou 100 keer oor die verloop van drie dae op Twitter moet jammer sê.
“Ek het Blu Inc Media en Female Magazine belaster. My tweets oor hul mensebronne-afdeling is onwaar,” moes hy tweet. “Ek neem my woorde terug en vra om verskoning,” het die tweets sedert Donderdag sowat elke 30 minute gelui.
Volg Nuus24 op Twitter.
- AP