Planne vir nuwe hoëspoed treine in Engeland

2013-01-28 17:43

Londen – Brittanje het besonderhede bekendgemaak van planne vir spoorlyne met hoëspoed treine wat Londen met die noorde van Engeland sal verbind.

Treine op die spoorlyne sal tot 360 km/h kan ry.

Die regering sê die Hoëspoed 2-projek sal die eerste nuwe spoorlyn wees wat in meer as ‘n dekade noord van Londen gebou is en sê dit sal ekonomiese en omgewingsvoordele inhou.

Teenstanders van die projek meen egter dat dit die skoonheid van die platteland sal ruïneer.

Die eerste 225 km van die spoor sal Londen met Birmingham, Engeland se tweede grootste stad, verbind.

Die tweede deel sal na die noordelike stede Manchester en Leeds strek.

Beamptes sê die projek, wat £32,7 miljard (R461 miljard) sal beloop, sal minstens 100 000 werke skep en reistye sal byna halveer word.

Die spoorlyn sal na verwagting teen 2032 voltooi wees.

– Volg Nuus24 op Twitter
 

- Sapa - AP