Pikkewyne se jagtegnieke bekyk
2013-01-22 14:12
Tokio – Miniatuur-kameras wat aan pikkewyne se koppe vasgemaak word, het Japannese wetenskaplikes ‘n nuwe manier gegee om dié diere se merkwaardige jagvaardighede onderwater te bestudeer, het die hoofnavorser Dinsdag gesê.
Die videokameras, wat net 33 gram weeg en met versnellings-, diepte- en termometers toegerus is, stel wetenskaplikes in staat om presies te sien wat Adelie-pikkewyne sien wanneer hulle gaan jag.
Yuuki Watanabe, ‘n wetenskaplike by die Nasionale Instituut van Polêre Navorsing in Tokio, het gesê die span was verbaas om te sien dat die pikkewyne hul jagtegniek aanpas afhangend van wat hulle jag.
Die versnellingsmeter, ‘n toestel wat ook in selfone en tablet-rekenaars gebruik word, het die navorsers in staat gestel om die diere se kopbewegings te meet.
“Nou dat ons sien wat die Adelie-pikkewyne eet en hoeveel hulle eet, kan ons begin verstaan hoe die pikkewyn oorleef in sy omgewing,” het Watanabe aan AFP gesê.
– Volg Nuus24 op Twitter
- Sapa - AFP
