Piesang-onderklere nou beskikbaar
2010-03-06 01:19
Sydney - ‘n Australiese onderkleremaatskappy, AussieBum, het die aap uit die mou gelaat en ‘n splinternuwe reeks onderklere bekendgestel wat uit piesangs gemaak word.
Hierdie omgewingsvriendelike onderklere inkorporeer sowat 27% piesangvesel, 64% katoen en 9% lycra, het AussieBum se Lloyd Jones Vrydag gesê.
Die piesangvesel word verkry vanaf die bas van ‘n piesangboom en sorg dat die onderklere byna veerlig is.
“Ons kon eenvoudig nie meer vesel gebruik nie want dan sou die onderklere te papperig gewees het. Maar ons kliënte hoef hulle glad nie te bekommer nie, die onderklere ruik glad nie na piesang nie,” het Jones spottenderwys gesê.
- Reuters